...

Jæja, þá er ég loksins orðin veik. Búin að bíða eftir þessu í marga daga. Óþolandi svona þegar maður er búin að finna fyrir þessu í marga daga, samt frekar óljóst, er maður að verða veikur eða ekki? Miklu betra að verða bara, búmm, allt í einu lasinn, taka það út á tveimur dögum og svo bara búið, heldur en að vera svona eins og drusla í marga, marga daga, og verða sko kannski aldrei almennilega lasin, en vera samt á hálfum hraða í tvær vikur.

Ég er búin að skrá mig á námskeið í, haldið ykkur fast, Halmbyggeri. Níu daga námskeið í byrjun apríl. Það verður sko ekkert smá gaman, fyrir mig, aumingja Páll situr náttúrulega eftir með þrjú orkustykki. Ég er að velta því fyrir mér hvort ég eigi ekki bara að taka Yrju með mér, hún hefur örugglega gaman að því að klessa leir á hálmveggi.

Annars erum við nokkuð viss um að við förum til Ungverjalands í byrjun júní, í nokkrar vikur, þannig að ef einhvern langar að passa íbúðina á meðan þá er sá hinn sami velkominn. Svo er aldrei að vita nema við förum til Wales í lok sumars, ef kallinn sem er að fara byggja hefur samband, þannig að þá yrði íbúðin líka laus. En þetta er reyndar mjög óljóst ennþá.